BORRADOR

 BORRADOR DA DECLARACIÓN

DO IRPF

R.I.P.

A QUEN CORRESPONDA

Non sei por que teño que faser declarasión ningunha a ninguén

Pero como hai que fasela

Que ten que ser como eles digan

Pois prosedo a faser a miña declarasión

Eu declaro abertamente o conflito non armado con armas convencionais

Senón con metralla abstracta recheíña de eternidade

A guerra 

á podredume deste sistema e

Tamén declaro o meu amparo incondicional a Terra

o único que temos

Outrosí, sisirisí, declaro a miña independencia.

Por se alguén non o pillou isto é un golpe en toda regra

O parlamento é o mundo e eu digo

Corpos a terra

Que en min mando eu

E ninguén máis

E declaro que detesto mandar en ninguén

Quenqueira ser mandado

Que se deixe estar como está

E aquí non pasa nada

Eu non o vou criticar

Pero declaro que nunca a súa condición de mandado

Será obxecto dos escritos, nin dos comentarios de quen fai esta declaración

Que máis podo declarar, ai, si

Declaro que non son católica

Que son panteísta politeísta animista individualista e bastante primitiva

Declaro que conservo trazos dos primates

E raíz de fento

E agar agar das medusas

E o ferrete velenoso dalgúns insectos

Dos insectos declaro que o que máis me gusta é a ollada poliédrica

A multiplicidade de puntos de vista simultáneos

Eu xa sei que isto vai gravar moito na miña declaración

Pero prefiro declaralo

Non vaia ser que se presente un inspector e despois sexa peor o remedio que a enfermidade

Declaro así mesmo estar posuída polo demo como mínimo un día á semana

E entrar nunha pedra de ámbar todas as tardes posibles

Declaro que todo o que ten amor me namora

E que o puro odio me espanta e me anula e ponme enferma

Declaro unha fe incondicional na beleza da vida

E na beleza da morte

E declaro que non consinto que ninguén me impoña cos seus limitados aparellos a súa limitada visión

Declaro formal e solemnemente estar en posesión das miñas facultades mentais

Sométoas quinsenalmente a probas de lume

Declaro coas miñas mans enriba do libro sagrado do mundo estar sempre aberta a todo milagro, a todo prodixio, a toda marabilla

A ver en canto queda isto

Non pasa nada se non dá a devolver

E se dá a paghar, pághase

Todo o que sexa necesario e se a alguén lle fode..... pois que lle siga fodendo!

http://sobredosi.blogspot.com/2011/01/carta-oberta-als-deus.html

http://elsuelosiguetemblando.blogspot.com/2011/01/eternos-potenciales.html

http://mikelcaverna.blogspot.com/2011/01/mind-is-target.html