MENHIR 8

MENHIR DO DESEXO

DIÁLOGOS EN DIFERIDO

Apontoados na distancia dos ecos

Somos dúas pingas calcáreas

Solidificándose eternamente

Ata caer nesa oquedade absurda

Do silencio da galería

Asíduos visitantes importunan

A nosa transformación cuántica en espacios circulares

Por onde esvaran os nosos soños cacarañados

Mesturados co seu escandaloso esborrexer

Polos chanzos asimétricos que os internan cada vez máis adentro

Cada vez máis fóra de si mesmos

Fundíndonos todos en perpetua aliaxe de cables mutantes

Observo pormenorizadamente

O labirinto negro das túas meniñas esculcándome

Adíome aínda un pouco

No lago irisado

De escamas de carpas volátiles

A faiscaren na tona da verde cobregante

Dos teus cómaros errantes

Estantío instante en que

Esteas que somos destinadas a atopárense

Delongámonos ata sermos só

Proxectos de árbores inmutables

Botando raigames

Nos intrincados arames

Que abalan a bóla terrestre

Cara ese algures impenetrable

Dos espacios cósmicos curvándose

Ti e máis eu colindantes

Entrelazando en apertas celulares

As pólas minerais

Das follas nigromantes

Caen xa pelouros líquidos

De arriba para abaixo a pararen

De abaixo para arriba petrificándose

Estalactita ti, estalagmita eu iniciándome.

Que meniño absurdo

Virá nese mañán inminente

De aquí a tantas eras

Eivado de eiras salvaxes

Ollar como encetamos a anos luz da nosa singradura

Ese primeiro beixo espreitante?

Que traxectoria tomarán

As nosas xeiras de cadáveres ambulantes

Cando xa os milleiros de beixos se transformen

Un dia amante calquera

En beizos de diamante

Desexo puro crispándose?

Estalactita eu, estalagmita ti

A propagármonos

Solidarizándose

Cada día unha micra de segundo

Cada ano unha hora

Cada milenio unha tarde

Que raro alambique nos transforma?

En que alquitara dos vencidos se está a destilar

Este quererse dar ata tocarse implacables

No frío esférico do mármore

Teimudamente axexantes

A miles de anos luz interestelares?


Saraares


http://pon-a-dormir-el-lenguaje.blogspot.com/2010/05/kind-of-love.html


http://deleuzefilosofia.blogspot.com/2011/02/cartografias-del-deseo.html

http://deleuzefilosofia.blogspot.com/2011/03/del-deseo.html

a flor da vida
acrílico sobre táboa